१९ चैत्र, सिन्धुपाल्चोक एकसाता नपुग्दै चीनबाट ठूलो परिणाममा अवैध इलेक्ट्रिक चुरोट (भेप) तातोपानी भन्सार कार्यालयमा भित्रिएको छ । लार्चा स्थित सुख्खा बन्दगाहमा ९ सय ८० कार्टुन भेप भित्रिएको त्याहाँ कार्यरत मजदुरले सिन्धुज्वालालाई बताए । आज दिउसो भेप भन्सार कार्यालयमा आईपुगेको तर कति मात्रा छ भन्ने कुरा यकिन नभएको तातोपानी भन्सार कार्यालयका प्रमुख भन्सार अधिकृत कमल कुमार भट्टराईले बताए । ‘कति मात्रामा छ भन्ने कुरा मलाई एकिन थाहा भएन, भेप आएको हो हामीले सुरक्षित राखेका छौं’, प्रमुख भन्सार अधिकृत भट्टराईले भने । भेप कस्ले ल्याएको भन्ने कुरा नखुलेको उनको भनाई छ ।
केही साता अघि पनि प्रहरीले भेप ओसारपसारमा संलग्न चालक सहित कन्टेनरलाई समातेको थियो । त्यस्तै इमाडोलस्थित गोदामबाट ८६ हजार थान अवैध इलेक्ट्रिक चुरोट (भेप) सहित दुई कर्मचारीलाई प्रहरीले पक्राउ गरेको थियो । सिल्क ट्रान्सपोर्टले आफ्ना दुई कर्मचारी छुटाउन राजस्व अनुसन्धान विभागमा २० करोड १६ लाख रुपियाँ धरौटी राखेर छुटाएको थियो । श्रोतका अनुसार सिल्क ग्रुपका विजय शेर्पाले दुई कर्मचारी छुटाउन राजस्वमा उक्त रकमको बैङ्क ग्यारेन्टी बुझाएका थिए। बैङ्क ग्यारेन्टी प्राप्त भएपछि भेपसहित पक्राउ परेका दुई कर्मचारी छुटेका हुन् ।
गोदामका कर्मचारीले यति ठुलो रकम बैङ्क ग्यारेन्टी राख्न नसकेपछि सिल्कले राखेको हो । बैङ्क ग्यारेन्टी राख्ने समयसम्म सिल्क ग्रुपका अध्यक्ष रमेश शेर्पा सार्वजिक भएका थिएनन । बैङ्क ग्यारेन्टी राखिएपछि मात्रै शेर्पा सार्वजनिक भएका थिए ।
प्रहरीका अनुसार सिल्क ग्रुपको गोदामबाट बरामद गरेको अवैध भेप कसको हो भन्ने पक्राउ परेका ती कर्मचारीले यकिन बयान दिएका छैनन । धरौटीमा छुटेका दुई कर्मचारी सो गोदाममा कार्यरत कर्मचारी हुन् । पक्राउ परेकालाई ९० दिनसम्म हिरासतमा राखेर अनुसन्धान गर्न सकिने प्रावधान छ । खास मालिक पहिचान नभएको र अनुसन्धानका लागि तोकिएको समय पूरा नभएका कारण भेपको मूल्य यकिन गरेर धरौटी माग गरिएको थियो । पछिल्लोपटक यो नाकाबाट अवैध इलेक्ट्रिक चुरोट (भेप) ओसारपसार धेरै हुने गरेको छ
